ប្រទេសអេមីរ៉ាតអារ៉ាប់៖ រដ្ឋមន្ត្រីពាណិជ្ជកម្មកម្ពុជា លោកស្រី ចម និម្មល បានដឹកនាំគណៈប្រតិភូក្រសួងពាណិជ្ជកម្ម ធ្វើទស្សនៈកិច្ចនៅមជ្ឍមណ្ឌលពាណិជ្ជកម្មឯកជនកម្ពុជានៅទីក្រុងឌូបៃ (Cambodia Private Commercial Center in Dubai) ដែលមានទីតាំងនៅអគារ Burj Khalifa ទីក្រុងឌូបៃ នាព្រឹកថ្ងៃអង្គារ ទី២៨ ខែវិច្ឆិកា ឆ្នាំ២០២៣ នៅទីក្រុងឌូប៉ៃ ប្រទេសអេមីរ៉ាតអារ៉ាប់ ដើម្បីស្វែងយល់អំពីវឌ្ឍនភាព និងទិសដៅការងាររបស់មជ្ឈមណ្ឌល។

ក្នុងពេលទស្សនៈកិច្ចនោះ លោកស្រីបានជម្រាបជូនដល់អ្នកតំណាងមជ្ឈមណ្ឌលអំពីកាលានុវត្តភាពពាណិជ្ជកម្មនៅកម្ពុជា និងអំពីអត្ថប្រយោជន៍ដែលរំពឹងនឹងទទួលបានពីការអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា និងអេមីរ៉ាតអារ៉ាប់រួមនាពេលអនាគតដ៏ខ្លី។

ក្នុងឱកាសនេះផងដែរលោកស្រីរដ្ឋមន្ត្រី ក៏បានអនុញ្ញាតជូន កញ្ញា Chenling Zhang អគ្គនាយិកាក្រុមហ៊ុន OneRoad គ្រុប ជួបសម្តែងការគួរសម និងពិភាក្សាការងារអំពីការពង្រឹង និងពង្រីកសកម្មភាពវិនិយោគ ព្រមទាំងការធ្វើពាណិជ្ជកម្មរបស់ក្រុមហ៊ុន ដែលកំពុងមានសកម្មភាពនៅក្នុងប្រទេសទាំងពីរ៕